நாகர்கோவில்: தமிழகம் செயின்ட் ஜார்ஜ் கோட்டையில் இருந்துதான் ஆளப்பட வேண்டுமே தவிர, டெல்லியில் இருந்து ஆளும் நிலை ஒருபோதும் ஏற்படக் கூடாது என்று முதல்வர் மு.க.ஸ்டாலின் ஆவேசமாக உரையாற்றினார்.
நாகர்கோவில் கன்கார்டியா பள்ளி மைதானத்தில் நேற்று நடைபெற்ற பிரம்மாண்ட அரசு விழாவில், ரூ.1,785.37 கோடி மதிப்பிலான 1,217 முடிவுற்ற திட்டப் பணிகளைத் திறந்து வைத்தும், 1,237 புதிய திட்டங்களுக்கு அடிக்கல் நாட்டியும், 3.12 லட்சத்திற்கும் மேற்பட்ட பயனாளிகளுக்கு நலத்திட்ட உதவிகளை வழங்கியும் முதல்வர் உரையாற்றினார்.
“வாக்களிக்காத மக்களுக்கும் சேர்த்துதான் உழைக்கிறேன்”
விழாவில் பேசிய முதல்வர், “50 ஆண்டுகால தொடர் உழைப்பால் இந்தப் பேரியக்கத்தின் தலைவர் என்ற பொறுப்பை அடைந்திருக்கிறேன். எனக்கு வாக்களித்த மக்களுக்கு மட்டுமின்றி, வாக்களிக்காத மக்களுக்கும் சேர்த்துதான் நான் உழைக்கிறேன். தேர்தல் நேரத்தில் மட்டும் மக்கள் மீது அக்கறை காட்டி சிலர் வட்டமடிப்பார்கள். பிரதமர் மோடி தேர்தல் சீசனுக்காக அடிக்கடி தமிழகம் வரத் தொடங்கியுள்ளார். அவர் எத்தனை முறை வருகிறாரோ, அந்த அளவுக்குத் தேசிய ஜனநாயகக் கூட்டணி பெரிய வாக்கு வித்தியாசத்தில் தோல்வியடையும். ஏனெனில், அவர் தமிழகத்திற்கு ஒன்றுமே செய்யவில்லை என்பது மக்களுக்குத் தெரியும்,” என்று விமர்சித்தார்.
குஜராத் Vs தமிழ்நாடு: மெட்ரோ திட்டப் புறக்கணிப்பு
மத்திய அமைச்சரவைக் கூட்டத்தில் குஜராத் மெட்ரோ திட்டத்திற்கு ஒப்புதல் வழங்கப்பட்டுள்ளது, ஆனால் தமிழகத்திற்கு எதுவுமில்லை என்று சுட்டிக்காட்டிய முதல்வர், “பாஜக இருக்கும் இடத்தில் வளர்ச்சி இருக்காது, வளர்ச்சி இருக்கும் இடத்தில் பாஜக இருக்காது” என்று சாடினார்.
மதநல்லிணக்கம் மற்றும் திராவிட மாடல்
பாஜக ஆளும் மாநிலங்களில் சிறுபான்மையினர் மீது நடத்தப்படும் தாக்குதல்கள் மற்றும் மணிப்பூர் கலவரத்தைக் குறிப்பிட்ட முதல்வர், தமிழகத்தில் மதநல்லிணக்கம் பேணப்படுவதாகக் கூறினார். மேலும், “வரலாற்றிலேயே இல்லாத வகையில் 4,000 கோயில்களுக்குக் குடமுழுக்கு செய்திருக்கிறோம். இதைக்கண்டு பாஜக கண் உறுத்தலில் இருக்கிறது,” என்றார்.
“பூஜ்ஜியமும் பூஜ்ஜியமும் சேர்ந்தால் பூஜ்ஜியம்தான்”
அதிமுக மற்றும் பாஜக கூட்டணியைக் கடுமையாக விமர்சித்த அவர்:
பாஜக: ஒரு டப்பா இன்ஜின்.
அதிமுக: ஒரு மூழ்கும் கப்பல்.
“இந்த இரண்டையும் நம்பி இருப்பவர்களுக்கு ‘ராஜ்ஜியம்’ கிடைக்காது, வெறும் ‘பூஜ்ஜியம்’ தான் மிஞ்சும். ஆனால் திராவிட மாடல் அரசு 11.19 சதவீத வளர்ச்சியோடு ‘சூப்பர் பாஸ்ட்’ இன்ஜினாக முன்னோக்கிச் செல்கிறது,” என்று பெருமிதம் தெரிவித்தார்.
திராவிட மாடல் 2.0 உறுதி
மகளிர் உரிமைத் தொகையைத் தடுத்து நிறுத்தி அரசுக்கு எதிராகச் சூழ்ச்சி செய்தவர்களை முறியடித்து, முன்பணமாக ரூ.5,000 வழங்கியிருப்பதாகக் குறிப்பிட்ட அவர், தமிழகத்தில் மீண்டும் ‘திராவிட மாடல் 2.0’ ஆட்சிதான் அமையும் என்று உறுதிபடத் தெரிவித்தார்.
இந்நிகழ்ச்சியில் அமைச்சர்கள் மனோ தங்கராஜ், கீதா ஜீவன், அனிதா ராதாகிருஷ்ணன், டி.ஆர்.பி.ராஜா, நாடாளுமன்ற உறுப்பினர் விஜய் வசந்த் மற்றும் மாவட்ட ஆட்சியர் உள்ளிட்ட முக்கியப் பிரமுகர்கள் கலந்துகொண்டனர்.
