தூத்துக்குடியில் விசாரணைக்காக காவல்துறையினரால் அழைத்துச் செல்லப்பட்ட இளைஞர் அருணாச்சலம் உயிரிழந்த சம்பவத்துக்கு, சட்டப்பேரவை எதிர்க்கட்சித் தலைவர் உதயநிதி ஸ்டாலின் மற்றும் தூத்துக்குடி மக்களவை உறுப்பினர் கனிமொழி ஆகியோர் கடும் கண்டனம் தெரிவித்துள்ளனர்.
இதுகுறித்து உதயநிதி ஸ்டாலின் தனது எக்ஸ் சமூக வலைதளப் பதிவில், “தூத்துக்குடியில் விசாரணைக்காக அழைத்துச் செல்லப்பட்ட அருணாச்சலம் என்ற இளைஞர் காவல்துறையினரின் தாக்குதலுக்கு ஆளாகி உயிரிழந்தது மிகுந்த வேதனை அளிக்கிறது. தனது இறுதி தருணங்களில் காவல்துறையினர் தமக்கு இழைத்த அநீதியை அருணாச்சலமே கூறியிருப்பது மனதை உலுக்குகிறது” என்று குறிப்பிட்டுள்ளார்.
மேலும், “காவல் மரணங்கள் நடைபெறும் ஒவ்வொரு முறையும், காவல்துறைக்குப் பொறுப்பு வகிக்கும் முதல்வர் உரிய நடவடிக்கை எடுக்காமல் மவுனம் காப்பதால், இதுபோன்ற சம்பவங்கள் தொடர்ந்து நடைபெற்று வருகின்றன. மகனை இழந்து தவிக்கும் குடும்பத்தினருக்கு அரசு என்ன பதில் சொல்லப் போகிறது?” என்றும் அவர் கேள்வி எழுப்பியுள்ளார்.
இதேபோல், தூத்துக்குடி மக்களவை உறுப்பினர் கனிமொழி தனது சமூக வலைதளப் பதிவில், “நாகர்கோவிலைத் தொடர்ந்து தூத்துக்குடியிலும் காவல்துறையின் சித்திரவதையால் இளைஞர் ஒருவர் உயிரிழந்ததாக வெளியாகும் தகவல் வேதனை அளிக்கிறது” என்று தெரிவித்துள்ளார்.
மேலும், “காவல்துறைக்குப் பொறுப்பு வகிக்கும் முதல்வர் உள்ளிட்ட அமைச்சர்கள் திரைப்படம் பார்ப்பதில் ஈடுபட்டிருப்பதாக செய்திகள் வெளியாகும் நிலையில், தமிழ்நாட்டில் அரசு செயல்படுகிறதா என்ற சந்தேகம் எழுகிறது. பணிக்குத் திரும்பிய பிறகாவது இந்த காவல் மரணம் குறித்து அரசு விளக்கம் அளித்து, உரிய நடவடிக்கை எடுக்க வேண்டும்” என்றும் கனிமொழி வலியுறுத்தியுள்ளார்.
தூத்துக்குடி இளைஞர் உயிரிழப்பு சம்பவம் தொடர்பாக முழுமையான விசாரணை நடத்தி, உண்மை நிலையை வெளிக்கொண்டு வர வேண்டும் என்ற கோரிக்கையும் அரசியல் வட்டாரங்களில் வலுத்து வருகிறது.
