டெல்லியின் புதிய முதலமைச்சர் யார் என்ற போட்டியில் பா.ஜ.கவின் முக்கிய தலைவர்கள் 5 பேரின் பெயர்கள் பரிசீலனையில் இருக்கின்றன.
பெரும் எதிர்பார்ப்பு மற்றும் பரபரப்புகளுக்கு இடையே தலைநகர் டெல்லி சட்டப்பேரவைத் தேர்தல் முடிவுகள் வெளியாகி இருக்கின்றன. தேர்தலுக்குப் பிந்தைய கருத்துக்கணிப்புகள் இந்த முடிவுகளை உண்மையாக்கி உள்ளன. அதன்படி 27 ஆண்டுகளுக்குப் பின் பா.ஜ.க ஆட்சியைப் பிடித்து இருக்கிறது.
பெரும்பான்மைக்கும் (36 தொகுதிகள்) அதிகமான இடங்களைக் கைப்பற்றி ஆட்சியைக் கைப்பற்றி இருப்பதால் பா.ஜ.க முக்கிய தலைவர்கள், தொண்டர்கள் கொண்டாட்டத்தில் உள்ளனர். சொல்லியபடி வெற்றியை தனதாக்கிய பா.ஜ.கவில் இப்போது டெல்லியின் புதிய முதலமைச்சர் யார் என்ற கேள்வி எழுந்துள்ளது.
முதல்வராக யார் அமரப் போகிறார்கள் என்பதை கட்சியின் மத்திய தலைமை முடிவு செய்யும் என்று டெல்லி பா.ஜ.க தலைவர் சச்தேவ் கூறி இருக்கிறார். அவர் மேலும் கூறுகையில், கட்சியினர் வெற்றிக்காக கடுமையாக உழைத்துள்ளனர். எங்கள் கட்சியின் உயர் தலைமைக்கு கிடைத்த முக்கிய வெற்றி. டெல்லியில் நிலவும் மக்கள் பிரச்னைகளை மையமாக வைத்து தேர்தலை சந்தித்து வெற்றி பெற்றுள்ளோம் என்றார்.
வெற்றிக் கொண்டாட்டங்கள் ஒரு பக்கம் களைகட்டிய நிலையில் தலைநகர் டெல்லியின் புதிய முதலமைச்சர் யார் என்ற பெரும் எதிர்பார்ப்பு எழுந்துள்ளது. அதில் 5 பேரின் பெயர்கள் பரிசீலனையில் உள்ளதாக தெரிகிறது. அந்த 5 பேரின் விபரங்கள் :-
பர்வேஷ் சாகிப் சிங் வர்மா:
முன்னாள் எம்.பியான பர்வேஷ் சாகிப் சிங் வர்மா பா.ஜ.கவின் முக்கிய முகமாவார். தேர்தலில் டெல்லியில் 3 முறை வென்ற அர்விந்த் கெஜ்ரிவாலை தோற்கடித்து அனைவரது கவனத்தையும் பெற்றுள்ளார். டெல்லியின் முன்னாள் முதல்வர் சாகிப் சிங் வர்மாவின் மகன் என்பது கூடுதல் பலம். கெஜ்ரிவாலின் வலிமையான ஓட்டு வங்கி மற்றும் மக்கள் மத்தியில் கட்டமைக்கப்பட்ட பிம்பத்தை தேர்தலில் உடைத்தவர் என்ற பெயர் இவருக்கு உண்டு.
விஜேந்தர் குப்தா
டெல்லி பா.ஜ.க தலைவராக திறம்பட செயலாற்றியவர். கட்சியின் மூத்த தலைவர். ஆம் ஆத்மியின் கடும் போட்டிக்கு இடையிலும் 2015 மற்றும் 2020 தேர்தலில் ரோகிணி தொகுதியில் தொடர்ந்து வெற்றிபெற்றவர். டெல்லி சட்டசபையில் எதிர்க்கட்சித் தலைவராக பணியாற்றியவர். கட்சியின் சீனியர், அனுபவம் வாய்ந்தவர் என்ற அடிப்படையில் இவர் பெயர் பரிசீலனையில் உள்ளது.
மன்ஜிந்தர்சிங் சிர்சா
ரஜௌரி கார்டன் தொகுதியின் எம்.எல்.ஏ. ஆம் ஆத்மி வேட்பாளர் தன்வாட்டி சந்தேலாவை தோற்கடித்தவர். முதலமைச்சர் ரேஸ் பட்டியலில் இவரது பெயர் முன்னணியில் இருக்கிறது.
துஷ்யந்த் கவுதம்
இவர் பா.ஜ.க தேசிய பொதுச்செயலாளர் மற்றும் கட்சியின் தலித் தலைவர். பா.ஜ.க முதல்வர் போட்டியில் இவரும் முன்னணியில் உள்ளார். கட்சியின் தொண்டர்கள் ஆதரவு கொண்ட இவர், முதலமைச்சர் பதவிக்கு தகுதியானவர் என்பது சீனியர்கள் கருத்தாக உள்ளது.
ஹரிஷ் குரானா
மோதி நகர் தொகுதியில் ஆம் ஆத்மி வேட்பாளர் ஷிவ்சந்திரன் கோயலை தோற்கடித்தவர். 1993ம் ஆண்டு முதல் 1996ம் ஆண்டு வரை டெல்லியின் முதலமைச்சராக இருந்த பா.ஜ.க மூத்த தலைவர் மதன்லால் குரானாவின் மகன். டெல்லி பா.ஜ.க செயலாளராக உள்ளார். கட்சியின் செய்தித்தொடர்பாளர் உள்ளிட்ட பல்வேறு பொறுப்புகளில் திறம்பட பணியாற்றியவர் என்பது குறிப்பிடத்தக்கது.
