மணிப்பூரில் குகி – நாகா சமூகத்தினரிடையே ஏற்பட்டுள்ள மோதல் காரணமாக முடக்கப்பட்டுள்ள தேசிய நெடுஞ்சாலைகளை மீண்டும் திறக்க இரு தரப்பினரும் இணைந்து செயல்பட வேண்டும் என்று உச்சநீதிமன்றம் அறிவுறுத்தியுள்ளது.
மணிப்பூர் மாநிலத்தில் குகி – நாகா ஆகிய பழங்குடியின சமூகத்தினரிடையிலான மோதல் காரணமாக, காங்போக்பி மாவட்டம் வழியாக செல்லும் தேசிய நெடுஞ்சாலை மூடப்பட்டுள்ளது. இதனால் உணவு, மருந்து, எரிபொருள் உள்ளிட்ட அத்தியாவசியப் பொருட்களின் விநியோகம் பாதிக்கப்பட்டுள்ளது.
இந்த நிலையில், முடக்கப்பட்டுள்ள சாலைகளை மீண்டும் திறக்க உத்தரவிடக் கோரி ‘குகி பெண்கள் மனித உரிமைகள் அமைப்பு’ சார்பில் உச்சநீதிமன்றத்தில் மனு தாக்கல் செய்யப்பட்டது.
இந்த மனு உச்சநீதிமன்ற தலைமை நீதிபதி சூர்ய காந்த், நீதிபதிகள் ஜாய்மால்யா பக்ஷி மற்றும் வி.மோகனா ஆகியோர் அடங்கிய அமர்வு முன்பு விசாரணைக்கு வந்தது.
அப்போது நீதிபதிகள் கூறியதாவது:-
“நெடுஞ்சாலைகள் முடக்கப்பட்டுள்ளதால் பொதுமக்கள் கடுமையாக அவதிப்பட்டு வருகின்றனர். சாலைகளை முடக்குவது யாருக்கும் பயனளிக்காது. எனவே, இரு தரப்பினரும் பரஸ்பரம் குற்றம்சாட்டுவதை விடுத்து, நெடுஞ்சாலைகளை திறப்பதற்கான நடைமுறை தீர்வை முன்வைக்க வேண்டும்.
வலுக்கட்டாயமாக சாலைத் தடுப்புகளை அகற்ற முயன்றால், அது மீண்டும் வன்முறைக்கு வழிவகுக்கக்கூடும். எனவே, பிரச்சினைக்கு அமைதியான முறையில் தீர்வு காண்பது அவசியம்.
தற்போது முடக்கப்பட்டுள்ள சாலைகளின் விவரங்களையும், அவற்றை மீண்டும் பயன்பாட்டுக்கு கொண்டு வருவதற்கான திட்டத்தையும் சம்பந்தப்பட்ட தரப்பினர் தாக்கல் செய்ய வேண்டும்” என்று நீதிபதிகள் அறிவுறுத்தினர்.
மணிப்பூரில் நீடித்து வரும் சமூக மோதலால் அத்தியாவசியப் பொருட்களின் விநியோகம் பாதிக்கப்படாமல் இருப்பதற்கும், பொதுமக்களின் நலனை கருத்தில் கொண்டு சாலைகளை மீண்டும் திறப்பதற்கும் உரிய நடவடிக்கை எடுக்க வேண்டியதன் அவசியத்தையும் உச்சநீதிமன்றம் வலியுறுத்தியுள்ளது.
