சென்னை: தமிழக சட்டப்பேரவை தேர்தலை முன்னிட்டு, அதிமுகவின் மூன்றாம் கட்ட தேர்தல் வாக்குறுதிகளை அக்கட்சியின் பொதுச்செயலாளர் எடப்பாடி பழனிசாமி இன்று (பிப். 24) வெளியிட்டார். இதில் “ஒவ்வொரு குடும்பத்திற்கும் ரூ.10,000 கருணைத் தொகை” என்பது உள்ளிட்ட 6 முக்கிய அறிவிப்புகள் இடம் பெற்றுள்ளன.
ஏற்கெனவே இரண்டு கட்டங்களாக வாக்குறுதிகள் வெளியிடப்பட்ட நிலையில், இன்றைய அறிவிப்புகள் மக்கள் மத்தியில் பெரும் எதிர்பார்ப்பை ஏற்படுத்தியுள்ளன.
3-ம் கட்ட வாக்குறுதிகளின் முக்கிய அம்சங்கள்:
அதிமுக வெளியிட்டுள்ள செய்திக்குறிப்பில் இடம்பெற்றுள்ள 6 முக்கிய வாக்குறுதிகள் இதோ:
- குடும்பங்களுக்கு கருணைத் தொகை: விலைவாசி உயர்வு மற்றும் வரி உயர்வால் பாதிக்கப்பட்டுள்ள மக்களின் சுமையை குறைக்க, ஒவ்வொரு குடும்பத்திற்கும் ரூ.10,000 கருணைத் தொகையாக வழங்கப்படும்.
- வேலையில்லா பட்டதாரிகளுக்கு உதவித்தொகை: வேலைவாய்ப்பு அலுவலகத்தில் பதிவு செய்து காத்திருக்கும் பட்டதாரிகளுக்கு மாதம் ரூ.2,000-மும், 12-ஆம் வகுப்பு முடித்தவர்களுக்கு மாதம் ரூ.1,000-மும் உதவித்தொகையாக வழங்கப்படும்.
- மீனவர் நலன்: மீன்பிடி தடைக் காலங்களில் மீனவர்களுக்கு வழங்கப்படும் நிவாரணத் தொகை ரூ.8,000-லிருந்து ரூ.12,000-ஆக உயர்த்தி வழங்கப்படும்.
- பொங்கல் பரிசு: ஆண்டுதோறும் வழங்கப்படும் பொங்கல் தொகுப்புடன் கூடுதலாக ரூ.1,000 ரொக்கம் வழங்கப்படும்.
- நெசவாளர்களுக்கு இலவச மின்சாரம்: * கைத்தறி நெசவாளர்களுக்கு: 300 யூனிட்டிலிருந்து 450 யூனிட்டாக உயர்வு.
- விசைத்தறி நெசவாளர்களுக்கு: 1,000 யூனிட்டிலிருந்து 1,400 யூனிட்டாக உயர்வு.
- சிறு வியாபாரிகள் கடன் தள்ளுபடி: நகரப்பகுதிகளில் நடைபாதை ஓரம் கடை வைத்துள்ள சிறு வியாபாரிகள், கூட்டுறவு வங்கிகளில் வாங்கிய கடன் முற்றிலும் தள்ளுபடி செய்யப்படும்.
முந்தைய முக்கிய வாக்குறுதிகள் ஒரு பார்வை:
கடந்த இரண்டாம் கட்ட அறிவிப்பில் அதிமுக சில அதிரடி வாக்குறுதிகளை வழங்கியிருந்தது குறிப்பிடத்தக்கது:
- முதியோர் ஓய்வூதியம் ரூ.2,000-ஆக உயர்வு.
- வங்கிகளில் பெற்ற கல்விக் கடன் தள்ளுபடி.
- ஆண்டுக்கு 3 கேஸ் சிலிண்டர்கள் இலவசம்.
- சிறுபான்மையின மகளிருக்கு சுயதொழில் தொடங்க வட்டியில்லா கடன்.
- மாற்றுத்திறனாளிகளின் கூட்டுறவு வங்கி கடன்கள் தள்ளுபடி.
திமுக அரசின் மீதான விலைவாசி உயர்வு புகார்களை முன்னிறுத்தி, இந்த “பணப்பலன்” சார்ந்த வாக்குறுதிகளை அதிமுக முன்வைத்துள்ளது அரசியல் களத்தில் விவாதங்களை கிளப்பியுள்ளது.
