வரும் தேர்தலில் அதிமுக கூட்டணியில் அங்கம் வகிக்கும் தமிழ் மாநில காங்கிரஸ் (தமாகா) கட்சிக்கு 5 தொகுதிகள் ஒதுக்கப்பட்டுள்ளன. இத்தொகுதிகள் அனைத்திலும் தமாகா வேட்பாளர்கள் பாஜகவின் ‘தாமரை’ சின்னத்தில் போட்டியிடுவார்கள் என அக்கட்சியின் தலைவர் ஜி.கே. வாசன் அறிவித்துள்ளார்.
இருப்பினும், தமாகாவுக்கு ஒதுக்கப்பட்ட தொகுதிகளின் பின்னணியையும், அங்கு களம் காணும் எதிரணி வேட்பாளர்களின் பலத்தையும் பார்க்கும்போது, அக்கட்சிக்கு இது ஒரு மிகப்பெரிய சவாலாகவே பார்க்கப்படுகிறது.
திமுகவின் ‘கோட்டைகளில்’ மல்லுக்கட்டும் தமாகா
ஒதுக்கப்பட்ட ஐந்து தொகுதிகளிலும் திமுக கூட்டணியின் செல்வாக்கு மிக்க வேட்பாளர்களை தமாகா எதிர்கொள்ள வேண்டியுள்ளது. அவர்கள் விபரம் வருமாறு:
ஈரோடு மேற்கு: செல்வாக்கு மிக்க மூத்த அமைச்சர் முத்துச்சாமி.
ராணிப்பேட்டை: அமைச்சர் காந்தி.
ஒட்டன்சத்திரம்: சட்டப்பேரவை கொறடா மற்றும் அமைச்சர் சக்கரபாணி.
கும்பகோணம்: திமுகவின் கோட்டையாகக் கருதப்படும் சாக்கோட்டை அன்பழகன்.
கிள்ளியூர்: காங்கிரஸ் சட்டமன்றக் குழுத் தலைவர் ராஜேஷ்குமார்.
வரலாற்று சவால்கள்
அதிமுக தாராளமாக தொகுதிகளைக் கொடுத்தது போலத் தெரிந்தாலும், தமாகாவிடம் ஒப்படைக்கப்பட்டுள்ள தொகுதிகள் அனைத்தும் அக்கட்சிக்கு வெற்றியைத் தராத ‘சவாலான’ இடங்கள் என்பது அரசியல் நோக்கர்களின் கருத்தாக உள்ளது.
கிள்ளியூர்: அதிமுக தேர்தல் வரலாற்றிலேயே இதுவரை வெற்றி பெறாத தொகுதி.
ஒட்டன்சத்திரம்: கடந்த 5 தேர்தல்களாக அதிமுகவுக்கு வெற்றிக் கனியாகவே இருந்து வருகிறது.
ராணிப்பேட்டை: கடந்த 10 ஆண்டுகளாக திமுகவின் வசமே உள்ளது.
கும்பகோணம்: சுமார் 30 ஆண்டுகளாக உதயசூரியன் சின்னமே இங்கு பிரகாசித்து வருகிறது.
ஈரோடு மேற்கு: எம்.ஜி.ஆர், ஜெயலலிதா, மு.க.ஸ்டாலின் என மூன்று முதல்வர்களின் அமைச்சரவையில் இடம்பிடித்த அனுபவம் வாய்ந்த முத்துச்சாமியை எதிர்ப்பது சாதாரண காரியமல்ல.
தமாகாவினரின் ஆதங்கம்
இதுவரை மக்களை நேரடியாகச் சந்திக்கும் தேர்தல் களத்தைத் தவிர்த்து, மாநிலங்களவை (மேல்சபை) உறுப்பினராகவே இருந்து வந்த ஜி.கே.வாசனுக்கு, பாஜக மேலிடம் இந்த 5 கடினமான தொகுதிகளைக் கொடுத்து ‘அக்னிப்பரீட்சை’யில் இறக்கி விட்டுள்ளதாகக் கட்சியின் அடிமட்டத் தொண்டர்கள் ஆதங்கம் தெரிவிக்கின்றனர்.
அதிமுகவின் பலம் குறைந்த, திமுகவின் கோட்டைகளாகக் கருதப்படும் இந்த தொகுதிகளில் தாமரைச் சின்னத்தில் போட்டியிடும் தமாகா வேட்பாளர்கள், இந்த ‘ஐம்பெரும்’ சவால்களை எப்படிச் சமாளிக்கப் போகிறார்கள் என்பதே தற்போதைய அரசியல் விவாதமாக மாறியுள்ளது.
