மேற்கு வங்க சட்டப்பேரவைத் தேர்தலை முன்னிட்டு, ஆளும் திரிணமூல் காங்கிரஸ் கட்சியின் தேர்தல் அறிக்கையை அக்கட்சியின் தலைவரும், முதல்வருமான மம்தா பானர்ஜி இன்று வெளியிட்டார். இதில் மகளிர் மற்றும் இளைஞர்களுக்கான முக்கிய அறிவிப்புகள் இடம்பெற்றுள்ளன.
லக்ஷ்மிர் பந்தர் திட்டத்தில் ரூ.500 உயர்வு
திரிணமூல் காங்கிரஸின் தேர்தல் அறிக்கையில் இடம்பெற்றுள்ள மிக முக்கியமான அம்சம், ‘லக்ஷ்மிர் பந்தர்’ திட்டத்தின் கீழ் வழங்கப்படும் மாதாந்திர உதவித்தொகை உயர்த்தப்படும் என்பதாகும்.
மகளிர் உதவித்தொகை: தற்போது வழங்கப்படும் தொகையுடன் கூடுதலாக ரூ.500 உயர்த்தப்படும்.
தற்போதைய நிலை: தற்போது பொருளாதாரத்தில் பின்தங்கிய பெண்களுக்கு ரூ.1,500-ம், எஸ்சி/எஸ்டி பெண்களுக்கு ரூ.1,700-ம் வழங்கப்பட்டு வருகிறது.
தேர்தல் அறிக்கையின் 10 முக்கிய வாக்குறுதிகள்
மக்களின் வாழ்வாதாரத்தை மேம்படுத்தும் வகையில் 10 முக்கிய வாக்குறுதிகளை மம்தா பானர்ஜி முன்வைத்துள்ளார்:
வேலையில்லாத இளைஞர்களுக்கு மாதம் ரூ.1,500 உதவித்தொகை.
ஒவ்வொரு குடும்பத்திற்கும் சொந்தமாக வீடு கட்டித் தரப்படும்.
அனைத்து வீடுகளுக்கும் குழாய் வழி குடிநீர் விநியோகம்.
ஒவ்வொரு ஒன்றியம் மற்றும் நகரத்திலும் தொடர் மருத்துவ முகாம்கள்.
அரசு பள்ளிகளில் உலகத்தரம் வாய்ந்த கட்டமைப்பு வசதிகள்.
நிர்வாக வசதிக்காக புதிதாக 7 மாவட்டங்கள் உருவாக்கம்.
“அறிவிக்கப்படாத குடியரசுத் தலைவர் ஆட்சி” – மம்தா கடும் சாடல்
தேர்தல் அறிக்கையை வெளியிட்ட பின் செய்தியாளர்களிடம் பேசிய மம்தா பானர்ஜி, பாஜக அரசு மீது கடுமையான குற்றச்சாட்டுகளை முன்வைத்தார்.
“மேற்கு வங்கத்தில் தோல்வி அடைவோம் என்பதை உணர்ந்த பாஜக, இங்கு அறிவிக்கப்படாத குடியரசுத் தலைவர் ஆட்சியை அமல்படுத்தியுள்ளது. என்ஆர்சி (NRC) மற்றும் மக்கள் தொகை கணக்கெடுப்பு மூலம் மக்களின் குடியுரிமையைப் பறிக்க மத்திய அரசு திட்டமிடுகிறது. நாடு தற்போது அழிவின் விளிம்பில் உள்ளது.”
மேலும், பல மாநிலங்களில் சட்டம் – ஒழுங்கு சீர்குலைந்துள்ளதாகவும், பிளவுபடுத்தும் அரசியல் மூலம் போர் போன்ற சூழலை பாஜக உருவாக்கி வருவதாகவும் அவர் குற்றம்சாட்டினார்.
தேர்தல் அட்டவணை ஒரு பார்வை
மேற்கு வங்கத்தில் உள்ள 294 தொகுதிகளுக்கு இரண்டு கட்டங்களாகத் தேர்தல் நடைபெற உள்ளது:
ஏப்ரல் 23: முதற்கட்டத் தேர்தல் (152 தொகுதிகள்).
ஏப்ரல் 29: இரண்டாம் கட்டத் தேர்தல் (142 தொகுதிகள்).
