விவசாயிகளை வஞ்சிக்கும் தவெக அரசைக் கண்டித்து ஆகஸ்ட் 3-ல் தஞ்சாவூரில் ஆர்ப்பாட்டம்

விவசாயிகளின் கோரிக்கைகளை வலியுறுத்தியும், காவிரி உரிமை விவகாரத்தில் தமிழக அரசின் செயல்பாடுகளை கண்டித்தும், ஆகஸ்ட் 3-ஆம் தேதி காலை 10 மணிக்கு தஞ்சாவூரில் மாபெரும் கண்டன ஆர்ப்பாட்டம் நடைபெறும் என்று திமுக தலைவர் மு.க.ஸ்டாலின் அறிவித்துள்ளார்.

இதுகுறித்து அவர் வெளியிட்டுள்ள அறிக்கையில், தேர்தலுக்கு முன்பு விவசாயிகளின் பயிர்க்கடன்களை முழுமையாக தள்ளுபடி செய்வதாக வாக்குறுதி அளித்த அரசு, தற்போது வரம்புடன் மட்டுமே கடன் தள்ளுபடி அறிவித்து விவசாயிகளை ஏமாற்றியுள்ளதாக குற்றம்சாட்டியுள்ளார். இதனால் விவசாயிகள் தொடர்ந்து போராட்டத்தில் ஈடுபட்டு வருவதாகவும் தெரிவித்துள்ளார்.

மேலும், கர்நாடக அரசு மேகேதாட்டு அணை திட்டத்தை தீவிரமாக முன்னெடுத்து வரும் நிலையில், தமிழக அரசு உரிய நடவடிக்கைகளை எடுக்காமல் மவுனமாக இருப்பதாகவும் அவர் விமர்சித்துள்ளார். அனைத்துக் கட்சிக் கூட்டம் மற்றும் விவசாய சங்க பிரதிநிதிகள் கூட்டத்தை உடனடியாக கூட்ட வேண்டும் என்ற கோரிக்கையையும் மீண்டும் வலியுறுத்தியுள்ளார்.

கடந்த ஆண்டு 6.5 லட்சம் ஏக்கரில் குறுவை சாகுபடி நடைபெற்ற நிலையில், இந்த ஆண்டு மேட்டூர் அணை திறக்கப்படாததால் சுமார் 1.5 லட்சம் ஏக்கரில் மட்டுமே சாகுபடி நடைபெற்றுள்ளதாகவும், இதனால் ரூ.2,500 கோடி இழப்பு ஏற்பட்டு 14 லட்சம் விவசாயிகள் பாதிக்கப்பட்டுள்ளதாகவும் அவர் குறிப்பிட்டுள்ளார்.

பாதிக்கப்பட்ட விவசாயிகளுக்கு ஏக்கருக்கு ரூ.25 ஆயிரம் நிவாரணம் வழங்க வேண்டும், பயிர் காப்பீட்டு பிரீமியத்தை அரசே செலுத்த வேண்டும், சம்பா சாகுபடிக்குத் தேவையான விதை, உரம், பூச்சிக்கொல்லி உள்ளிட்ட இடுபொருட்களை மானியமாக வழங்க வேண்டும் என்றும் அவர் கோரிக்கை விடுத்துள்ளார்.

இந்த கோரிக்கைகளை வலியுறுத்தி, வரும் ஆகஸ்ட் 3-ஆம் தேதி காலை 10 மணிக்கு தஞ்சாவூர் பனகல் கட்டடம் அருகே, திமுக இளைஞரணிச் செயலாளரும் சட்டப்பேரவை எதிர்க்கட்சித் தலைவருமான உதயநிதி ஸ்டாலின் தலைமையில் மாபெரும் கண்டன ஆர்ப்பாட்டம் நடைபெறும் என்றும், காவிரி டெல்டா மாவட்டங்களைச் சேர்ந்த நிர்வாகிகள், விவசாய சங்கங்கள் மற்றும் அரசியல் கட்சியினரும் பெருந்திரளாக பங்கேற்க வேண்டும் என்றும் மு.க. ஸ்டாலின் அழைப்பு விடுத்துள்ளார்.

AlsoRead

மதுரை பரமசிவம் மரணத்திற்க்கு காரணமான காவலர்களை பணி நீக்கம் செய்ய வேண்டும்

அதிமுகவும், பாமகவும் அமித் ஷாவின் குரலாக மாறிவிட்டன:

சுதந்திர தின அணிவகுப்பின்போது மயங்கி விழுந்து உயிரிழந்த காவலர் குடும்பத்துக்கு ரூ.30 லட்சம் நிதியுதவி

மேலும், இந்த ஆர்ப்பாட்டம் விவசாயிகளின் கோரிக்கைகளை அரசின் கவனத்துக்கு கொண்டு செல்லும் முதல்கட்ட நடவடிக்கையாகும் என்றும், அரசின் மெத்தனப்போக்கு தொடர்ந்தால் இன்னும் தீவிரமான போராட்டங்கள் முன்னெடுக்கப்படும் என்றும் அவர் எச்சரித்துள்ளார்.