கரூரில் 41 பேர் உயிரிழந்த சம்பவம் தொடர்பான வழக்கில், தமிழக வெற்றிக் கழகத் தலைவர் விஜய் மீது குற்றப்பத்திரிக்கை தாக்கல் செய்யப்படலாம் என்றும், அவர் கைது செய்யப்பட வாய்ப்புள்ளதாகவும் வெளியாகி வரும் தகவல்கள் அரசியல் வட்டாரத்தில் பெரும் பரபரப்பை ஏற்படுத்தியுள்ளன.
வீடியோ ஆதாரங்களை அழிக்க முயற்சியா?
இந்த வழக்கு தொடர்பாக டெல்லி விசாரணைக் குழுவினர் தீவிர சோதனையில் ஈடுபட்டு வருகின்றனர். தவெக மாநாட்டின் போது ட்ரோன்கள் மூலம் எடுக்கப்பட்ட வீடியோக்கள் மற்றும் விஜய் பேருந்தில் இருந்தபோது எடுக்கப்பட்ட வீடியோக்களை அதிகாரிகள் கைப்பற்றியுள்ளனர். இந்த வீடியோ ஆதாரங்களை அழிக்க முயற்சி நடந்ததாகக் கூறப்படும் நிலையில், விசாரணைக் குழுவினர் அவற்றை முழுமையாக மீட்டெடுத்துள்ளனர்.
விஜய் விசாரணையின் போது அளித்த தகவல்களுக்கும், தற்போது கிடைத்துள்ள வீடியோ ஆதாரங்களுக்கும் இடையே முரண்பாடுகள் இருப்பதாகத் தெரிகிறது. தவறான தகவல்களை அளித்ததன் அடிப்படையில், அவர் மீது குற்றப்பத்திரிக்கை தாக்கல் செய்ய அதிகாரிகள் ஆலோசித்து வருவதாகத் தெரிகிறது.
சங்கீதா விவகாரம்: தேர்தலில் போட்டியிடுவதில் சிக்கலா?
மற்றொரு பக்கம், விஜய்யின் தேர்தல் அரசியல் வாழ்வுக்கு அவரது குடும்ப விவகாரம் முட்டுக்கட்டையாக அமையலாம் என்ற பேச்சும் எழுந்துள்ளது. இன்னும் விவாகரத்து நடைமுறைகள் முழுமை பெறாத நிலையில், சட்டப்படி சங்கீதாவே தற்போதைய மனைவியாகக் கருதப்படுகிறார்.
வேட்புமனு தாக்கல் செய்யும் போது தனது மற்றும் மனைவியின் சொத்து விவரங்களை முழுமையாகக் காட்ட வேண்டியது கட்டாயம். இதில் ஏதேனும் தவறு நடந்தால் அல்லது தகவல்கள் மறைக்கப்பட்டால், அது குறித்து முறையிட சங்கீதா தரப்பு தயாராக இருப்பதாகக் கூறப்படுகிறது. சமீபத்தில் விற்கப்பட்ட சொத்து விவரங்களையும் அவர் சேகரித்து வைத்துள்ளதாகத் தகவல் கசிந்துள்ளதால், விஜய்யின் வேட்புமனு தள்ளுபடி செய்யப்படவும் வாய்ப்புள்ளதாக அரசியல் விமர்சகர்கள் கருதுகின்றனர்.
அரசியல் மோதல்கள்
இவ்வழக்கில் சிபிஐ விசாரணை கோரியதே தவெக தான் என்றாலும், உச்சநீதிமன்ற கண்காணிப்பில் நடக்கும் இந்த விசாரணையின் போக்கு தற்போது அக்கட்சிக்கு எதிராகவே திரும்புவது போன்ற சூழல் நிலவுகிறது. அதேபோல், பெண்களுக்குப் பாதுகாப்பு இல்லாதது குறித்து நடந்த கூட்டத்தில் சில அரசியல் பிரமுகர்கள் பேசிய விதம் மற்றும் அதற்குப் பின் அவர்கள் கேட்ட மன்னிப்பு குறித்தும் பொதுமக்கள் மத்தியில் அதிருப்தி நிலவி வருகிறது.
பாஜக மற்றும் பிற கூட்டணிக் கட்சிகளின் நிலைப்பாடும் இந்த வழக்கில் முக்கியப் பங்கு வகிக்கும் என்பதால், வரும் நாட்களில் விஜய்யின் அரசியல் நகர்வுகள் மிகுந்த எதிர்பார்ப்பை ஏற்படுத்தியுள்ளன.
