நடப்பு 2026–27 நிதியாண்டின் முதல் காலாண்டான ஏப்ரல் முதல் ஜூன் வரையிலான காலத்தில், இந்தியாவின் ஸ்மார்ட்போன் ஏற்றுமதி 23.4 சதவீதம் உயர்ந்து ரூ.82 ஆயிரம் கோடியைத் தாண்டியுள்ளது.
கடந்த நிதியாண்டின் இதே காலகட்டத்தில் ஸ்மார்ட்போன் ஏற்றுமதி ரூ.76 ஆயிரம் கோடியாக இருந்த நிலையில், இந்த ஆண்டு குறிப்பிடத்தக்க வளர்ச்சி பதிவாகியுள்ளது.
இந்தியாவில் தயாரிக்கப்படும் ஸ்மார்ட்போன்களுக்கு அமெரிக்கச் சந்தையில் தொடர்ந்து அதிக வரவேற்பு கிடைத்து வருவதால், இந்திய ஸ்மார்ட்போன் ஏற்றுமதிக்கான மிகப்பெரிய சந்தையாக அமெரிக்கா தொடர்ந்து முதலிடத்தில் உள்ளது.
இந்த வளர்ச்சியின் காரணமாக, நாட்டின் ஒட்டுமொத்த மின்னணு சாதன ஏற்றுமதியும் அதிகரித்துள்ளது. ஏப்ரல்–ஜூன் காலகட்டத்தில் ரூ.1.45 லட்சம் கோடி மதிப்பிலான மின்னணு சாதனங்கள் ஏற்றுமதி செய்யப்பட்டுள்ளன. இதில் ஸ்மார்ட்போன்களின் பங்களிப்பு மட்டும் 64.8 சதவீதம் ஆகும்.
இந்தியாவில் உற்பத்தி செய்யப்படும் ஸ்மார்ட்போன்களில் மூன்றில் ஒரு பங்கு வெளிநாடுகளுக்கு ஏற்றுமதி செய்யப்பட்டுள்ளதாகவும் தெரிவிக்கப்பட்டுள்ளது.
மத்திய அரசின் உற்பத்தியுடன் இணைந்த ஊக்கத்தொகை (PLI) திட்டம், சிறப்பு பொருளாதார மண்டலச் சீர்திருத்தங்கள், கூடுதல் பட்ஜெட் ஒதுக்கீடு மற்றும் அந்நிய நேரடி முதலீட்டுக்கான தளர்வுகள் ஆகியவை, இந்தியாவின் மின்னணு உற்பத்தி மற்றும் ஸ்மார்ட்போன் ஏற்றுமதி வளர்ச்சிக்கு முக்கிய காரணிகளாக அமைந்துள்ளதாகத் தெரிவிக்கப்பட்டுள்ளது.
