தமிழக வெற்றிக் கழகத்தின் பூந்தமல்லி தொகுதி வேட்பாளர் பிரகாசம் மீது அக்கட்சியைச் சேர்ந்த பெண் நிர்வாகி ஒருவர் பாலியல் புகார் அளித்திருப்பது அரசியல் வட்டாரத்தில் பெரும் பரபரப்பை ஏற்படுத்தியுள்ளது.
பின்னணி: தமிழக வெற்றிக் கழகத்தின் மகளிர் அணியில் பொறுப்பில் இருக்கும் பெண் நிர்வாகி ஒருவர், இன்று தனது கணவருடன் திருவள்ளூர் மாவட்ட காவல் கண்காணிப்பாளர் (எஸ்.பி.) அலுவலகத்திற்கு நேரில் வருகை தந்தார். அங்கு பூந்தமல்லி தொகுதி வேட்பாளர் பிரகாசம் தனக்கு பாலியல் ரீதியாக தொல்லை கொடுத்ததாக பரபரப்பு புகார் மனு ஒன்றை அளித்தார்.
கட்சித் தலைமை மீது அதிருப்தி:
அந்தப் பெண் நிர்வாகி, “இந்த விவகாரம் குறித்து ஏற்கனவே கடந்த 6 மாதங்களுக்கு முன்பே கட்சித் தலைமையிடம் ஆதாரங்களுடன் புகார் அளித்திருந்தேன். ஆனால், தலைமை தரப்பில் இருந்து கடந்த ஆறு மாதங்களாக எந்தவிதமான நடவடிக்கையும் எடுக்கப்படவில்லை. குற்றச்சாட்டுக்கு உள்ளான நபர் மீது நடவடிக்கை எடுப்பதற்குப் பதிலாக, அவருக்குத் தேர்தல் போட்டியிட வாய்ப்பு வழங்கப்பட்டுள்ளது,” என வேதனையுடன் தெரிவித்தார்.
காவல்துறையில் முறையீடு: கட்சியில் நீதி கிடைக்காத காரணத்தினாலேயே, தற்போது சட்ட ரீதியான நடவடிக்கை கோரி காவல்துறையை அணுகியுள்ளதாக அவர் குறிப்பிட்டுள்ளார். வேட்பாளர் ஒருவருக்கு எதிராக அக்கட்சியின் பெண் நிர்வாகியே காவல் நிலையத்தில் புகார் அளித்திருக்கும் சம்பவம் பூந்தமல்லி தொகுதி த.வெ.க. தொண்டர்களிடையே அதிர்ச்சியை ஏற்படுத்தியுள்ளது.
இந்த விவகாரம் தொடர்பாக பிரகாசம் தரப்பிலிருந்தோ அல்லது த.வெ.க. தலைமையிலிருந்தோ இதுவரை அதிகாரப்பூர்வ விளக்கம் எதுவும் அளிக்கப்படவில்லை.
