உலக நாடுகளின் எரிசக்தி தேவையில் முக்கிய பங்கு வகிக்கும் ஹார்முஸ் ஜலசந்தியை (Strait of Hormuz) ஈரான் முடக்கியுள்ள நிலையில், அமெரிக்க அதிபர் டொனால்ட் டிரம்ப் அந்த நாட்டுக்கு மிகக் கடுமையான எச்சரிக்கையை விடுத்துள்ளார். அடுத்த 48 மணிநேரத்திற்குள் இந்த கடல்வழிப் பாதை முழுமையாகத் திறக்கப்படாவிட்டால், ஈரானின் மிகப்பெரிய மின் உற்பத்தி நிலையங்கள் மீது தாக்குதல் நடத்தி அவை நிர்மூலமாக்கப்படும் என அவர் தெரிவித்துள்ளார்.
டிரம்பின் அதிரடி உத்தரவு
தனது சமூக வலைதளப் பக்கத்தில் இது குறித்துப் பதிவிட்டுள்ள அதிபர் டிரம்ப், “ஈரான் எவ்வித அச்சுறுத்தலும் இன்றி ஹார்முஸ் ஜலசந்தியை அடுத்த 48 மணிநேரத்திற்குள் முழுமையாகத் திறக்க வேண்டும். தவறினால், ஈரானின் பல்வேறு மின் உற்பத்தி நிலையங்கள் மீது அமெரிக்கா தாக்குதல் நடத்தும். குறிப்பாக, அந்த நாட்டின் மிகப்பெரிய மின் உற்பத்தி நிலையத்திலிருந்து இந்தத் தாக்குதல் தொடங்கி அவை அனைத்தும் தரைமட்டமாக்கப்படும்,” எனத் தெரிவித்துள்ளார்.
ஏன் இந்த மோதல்?
கடந்த பிப்ரவரி மாதம் முதல் அமெரிக்கா-இஸ்ரேல் படைகளுக்கும் ஈரானுக்கும் இடையே போர் பதற்றம் நிலவி வருகிறது. இதன் ஒரு பகுதியாக, உலகின் 20 சதவீத எண்ணெய் போக்குவரத்து நடைபெறும் ஹார்முஸ் ஜலசந்தியை ஈரான் தனது கட்டுப்பாட்டிற்குள் கொண்டு வந்துள்ளது. இதனால் சர்வதேச சந்தையில் கச்சா எண்ணெய் விலை கடுமையாக உயர்ந்துள்ளதுடன், உலக நாடுகளின் பொருளாதாரமும் பாதிக்கப்பட்டுள்ளது.
அமெரிக்கா உள்ளிட்ட நாடுகள் இந்த வழித்தடத்தை மீட்க முயன்று வரும் நிலையில், ஈரான் தொடர்ந்து முட்டுக்கட்டை போட்டு வருகிறது. நேற்றிரவு இஸ்ரேலின் டிமோனா பகுதியில் ஈரான் நடத்திய ஏவுகணைத் தாக்குதலில் பலர் காயமடைந்ததைத் தொடர்ந்து, அமெரிக்கா தனது நிலைப்பாட்டை மேலும் தீவிரப்படுத்தியுள்ளது.
ஈரானின் பதில் எச்சரிக்கை
டிரம்பின் இந்த 48 மணிநேரக் கெடுவுக்கு ஈரான் ராணுவம் உடனடியாகப் பதிலடி கொடுத்துள்ளது. “எங்களது எரிசக்தி அல்லது உள்கட்டமைப்புகள் மீது தாக்குதல் நடத்தப்பட்டால், இப்பகுதியில் உள்ள அமெரிக்காவின் அனைத்து எரிசக்தி நிலையங்கள், தகவல் தொழில்நுட்ப மையங்கள் மற்றும் கடல்நீரை குடிநீராக்கும் நிலையங்கள் மீது ஈரான் பதில் தாக்குதல் நடத்தும்” என ஈரான் எச்சரித்துள்ளது.
உலக நாடுகள் கவலை
48 மணிநேரக் கெடு இன்னும் ஒரு சில தினங்களில் (திங்கட்கிழமை இரவு) முடிவடைய உள்ள நிலையில், மத்திய கிழக்கு பிராந்தியத்தில் போர் மேகங்கள் மேலும் சூழ்ந்துள்ளன. இரு நாடுகளுக்கும் இடையே நேரடிப் போர் மூளும் அபாயம் ஏற்பட்டுள்ளதால், ஐரோப்பிய நாடுகள் மற்றும் ஐநா சபை அமைதி காக்க வலியுறுத்தி வருகின்றன.
