திருவண்ணாமலை எ. வ. வேலு பெண்கள் மெட்ரிக் மேல்நிலைப் பள்ளியில், பள்ளி படை வீராங்கனைகள் (Student Leaders & House Captains) பதவியேற்பு விழா நேற்று (ஜூன் 18, வியாழக்கிழமை) மிகச் சிறப்பாக நடைபெற்றது.
இவ்விழாவிற்கு பள்ளியின் நிர்வாக இயக்குநர் டாக்டர் எ. வ. வே. கம்பன் தலைமை தாங்கினார். பள்ளியின் முதல்வர் கிரேசி ஆண்டனி வரவேற்புரையாற்றி, சிறப்பு விருந்தினருக்கு பொன்னாடை போர்த்தி நினைவுப் பரிசு வழங்கி கௌரவித்தார்.
பதவியேற்பும் அணிவகுப்பும்:
விழாவில், இந்திய இராணுவத்தின் ஓய்வு பெற்ற பீரங்கிப்படை மேஜர் எஸ். விமல்ராஜ் சிறப்பு விருந்தினராகக் கலந்துகொண்டார். அவர், பள்ளியின் மாணவத் தலைவிகள் மற்றும் ஆரவல்லி, இமாலயா, நீல்கிரிஸ், விந்தியா ஆகிய நான்கு படை முகாம்களின் (Houses) வீராங்கனைகளுக்குப் பதவிகளுக்கான ‘பேட்ஜ்‘ (Badge) அணிவித்து, பதவியேற்பு உறுதிமொழி பிரமாணம் செய்து வைத்தார். இதனைத் தொடர்ந்து நடைபெற்ற படை வீராங்கனைகளின் கம்பீரமான அணிவகுப்பு மரியாதையைச் சிறப்பு விருந்தினர் ஏற்றுக்கொண்டார்.
பெண்கள் துணிச்சலுடன் சமுதாயக் கடமையாற்ற வேண்டும்: விழாவில் சிறப்பு விருந்தினர் மேஜர் எஸ். விமல்ராஜ் பேசுகையில், தான் இந்திய இராணுவ பீரங்கிப் படையில் பணியாற்றியபோது நிகழ்ந்த வீர தீர அனுபவங்களை மாணவிகளுடன் பகிர்ந்து கொண்டார். மேலும், “மாணவிகள் சிறு வயது முதலே துணிச்சல், தைரியம் மற்றும் உயரிய சிந்தனைகளை வளர்த்துக்கொள்ள வேண்டும்; நாட்டின் முன்னேற்றத்திற்காக சமுதாயக் கடமையாற்ற முன்வர வேண்டும்” என்று ஊக்கப்படுத்திப் பேசினார்.
விழாவின் நிறைவாக மாணவிகளின் கண்கவர் கலை நிகழ்ச்சிகள் நடைபெற்றன. நாட்டுப்பண்ணுடன் விழா இனிதே நிறைவுற்றது. விழாவிற்கான ஏற்பாடுகளைப் பள்ளி நிர்வாகமும் ஆசிரியர்களும் செய்திருந்தனர்.
