மதுரை தோப்பூரில் அமையவுள்ள எய்ம்ஸ் மருத்துவமனையின் கட்டுமானப் பணிகள் தற்போது வரை 47 சதவீதம் மட்டுமே நிறைவடைந்துள்ளதாக மத்திய அரசு தகவல் தெரிவித்துள்ளது.
சமூக ஆர்வலரின் கேள்வி
தென்காசி மாவட்டம், பாவூர்சத்திரம் அருகே உள்ள திப்பணம்பட்டியைச் சேர்ந்த சமூக ஆர்வலர் பாண்டிய ராஜா, தகவல் அறியும் உரிமைச் சட்டத்தின் (RTI) கீழ் மதுரை எய்ம்ஸ் திட்டத்தின் தற்போதைய நிலை குறித்து மத்திய சுகாதார மற்றும் குடும்ப நல அமைச்சகத்திடம் பல்வேறு கேள்விகளை எழுப்பியிருந்தார்.
இதற்கு மத்திய சுகாதார அமைச்சகத்தின் தலைமை பொது தகவல் அலுவலர் தர்ம் பீர் குமார் சிங் அளித்துள்ள பதிலில் முக்கிய விவரங்கள் வெளியாகியுள்ளன.
அமைச்சகம் அளித்துள்ள முக்கிய விவரங்கள்:
பணிகளின் நிலை: மதுரை எய்ம்ஸ் கட்டுமானப் பணிகள் இதுவரை 47% மட்டுமே முடிந்துள்ளன.
திட்ட மதிப்பீடு: இத்திட்டத்திற்கான மொத்த மதிப்பீடு ரூ. 2,021.51 கோடி ஆகும்.
மத்திய அரசு நிதி: இதுவரை மத்திய பட்ஜெட்டில் இருந்து ரூ. 471.02 கோடி நிதி ஒதுக்கப்பட்டு வழங்கப்பட்டுள்ளது.
முடிவடையும் காலம்: கட்டுமானப் பணிகளை முழுமையாக முடித்து, 2026 அக்டோபர் மாதத்திற்குள் திட்டத்தை ஒப்படைக்க இலக்கு நிர்ணயிக்கப்பட்டுள்ளது.
நீண்ட காலமாக எதிர்பார்க்கப்படும் இத்திட்டத்தின் மந்தமான போக்கை இந்தத் தரவுகள் உறுதிப்படுத்தியுள்ள நிலையில், நிர்ணயிக்கப்பட்ட 2026 இலக்கிற்குள் பணிகள் நிறைவடையுமா என்ற எதிர்பார்ப்பு மக்கள் மத்தியில் எழுந்துள்ளது.
